අඩු ඉඩක වගා කරමු
අපේ ආහාර අවශ්යතා සඳහා නිවසේදී ම එළවළු සහ කුළුබඩු වර්ග වගා කිරීම මේ කාලයට ගැළපෙන කදිම අදහසකි. කෙසේ වෙතත් ඔබ නාගරික ප්රදේශයක ජීවත්වන්නේ නම් ඔබට ඇති සීමිත ඉඩකඩ ගෙවතු වගාවක් සඳහා ප්රමාණවත්දැයි ඔබට සිතෙන්නට පුළුවන්. එසේ නම්, අඩු ඉඩකින් සාර්ථක ගෙවතු වගාවක් කිරීම සඳහා උපදෙස් කිහිපයක් මෙන්න.
කුඩා පැල තෝරා ගන්න
වගාව වර්ධනය වන විට, ඔබේ නිවස සහ ඒ අවට ඇති කුඩා ප්රමාණය තුළ එය පාලනය කිරීම පහසු විය යුතුයි. මේ සඳහා මිරිස්, තක්කාලි, ඉඟුරු, ලූනු, ගොටුකොළ, බණ්ඩක්කා සහ මාළු මිරිස් වැනි කුඩා පැල වඩාත් යෝග්ය වේ. එම පැල විශාල ලෙස වර්ධනය නොවුනද ඔබේ ආහාර වේල පෝෂණය කිරීමට තරම් ප්රමාණවත් වේ.
අලුත් වගා බිම් නිර්මාණය කරන්න
ඔබට ඇති ඉඩකඩ උපරිම ප්රයෝජනයට ගන්න. වගා කිරීම සඳහා බිම් කොටසේ ඉඩ නොමැති නම් ජනෙල් පඩිය සහ බැල්කනිය යනු ඔබේ පැල සහිත භාජන තැබීමට කදිම ස්ථානයකි. එවැනි ස්ථානවලට ප්රමාණවත් හිරු එළිය සහ වාතාශ්රය ලැබෙන අතර ජලය සහ පොහොර යොදමින් නඩත්තු කිරීම ද පහසු වේ. ඔබට තිරස් ආකාරයට පාත්ති සකස් කිරීම අපහසු නම්, හැමවිටම සිරස් ආකාරයට පාත්ති සකස් කිරීමට උත්සාහ කරන්න. පොඩි කාලයක් වැයකර, ගර්නි බෑග් සහිත එල්ලෙන පැල බහාලුමක් ලෙස හෝ පැරණි පොත් රාක්කයක් භාවිතයෙන් ඔබට එය සකස් කළ හැකිය.
නිර්පාංශු වගාවට යොමුවන්න
නාගරික ගෙවතු වගාව සඳහා ඇති ප්රධානතම අභියෝගය වන්නේ ඒ සඳහා ගැළපෙන සාරවත් පසක් සොයා ගැනීමයි. හයිඩ්රොපොනික් හෝ නිර්පාංශු වගාව යනු පස් නොමැතිව ජලය මත පැල වගා කිරීමයි. ඒ සඳහා අපට අවශ්ය වන්නේ පැලවලට සහාය වන ආධාරක රාමුවක් සකස් කිරීම සහ අවශ්ය විට දී ජල පදනමට පෝෂ්ය පදාර්ථ එකතු කිරීම පමණි.
ඵලදාව ලැබෙන කාලය පිළිබඳ සැලකිලිමත්වන්න
පැල තෝරාගැනීමේ දී ඒවායින් ඵලදාව ලැබීමට ගතවන කාලය පිළිබඳ සලකා බලන්න. උදාහරණයක් ලෙස රාබු, නිවිති, සලාද වැනි පැල වර්ග වගා කිරීමෙන් සති කිහිපයක් ඇතුළත ඵලදාව ලබාගත හැකි නමුත් මිරිස්, තක්කාලි, බණ්ඩක්කා වැනි පැල වර්ගවලින් ඵලදාව ලබාගැනීමට මාසයක් හෝ ඊට වැඩි කාලයක් ගත වේ. ඒ නිසා අඩු කාලයකින් සහ වැඩි කාලයකින් ඵලදාව ලැබෙන පැල මිශ්රව වගා කිරීමෙන් ඔබට හැමවිටම ඵලදාව ලෙස යමක් ලබාගත හැකිය.
ගෙවතු වගාව ඉගෙන ගන්න
ඔබ ගෙවතු වගාවට අලුතෙන් සම්බන්ධවන්නේ නම්, ඔබට අවශ්ය තොරතුරු ලබාගත හැකි ආකාර මෙන්න. කෘෂිකර්ම දෙපාර්තුමේන්තුවේ 1920 ක්ෂණික ඇමතුම් අංකය හරහා ඔබට අවශ්ය උපදේශ සේවා සහ නිවැරදි මග පෙන්වීම් ලබාගත හැකිය. අන්තර්ජාලය හරහා නාගරික ගෙවතු වගාවන් පිළිබඳ විස්තර ඔබට ඇති තරම් සොයා ගැනීමට හැකිය. සීමිත ඉඩ ප්රමාණයක වුවද ඔබේ කුඩා ගෙවත්ත දිනෙන් දින වර්ධනය වන විට, පැල පෝෂණය කිරීමෙන් සහ එහි ඵලදාවෙන් ඔබේ ආහාර වේල පොහොසත් කිරීමෙන් ඔබට සතුටක් ලැබෙනු ඇත.
බහුස්ථර වගා ක්රම භාවිතා කරන්න
සීමිත ඉඩකඩ උපරිම ලෙස ප්රයෝජනයට ගැනීමට එකම භාජනයක විවිධ උසින් වැඩෙන පැල වර්ග වගා කරන්න. උදාහරණයක් ලෙස, එකම බඳුනක තක්කාලි (ඉහළ), මිරිස් (මැද) සහ සලාද කොළ (පහළ) වගා කළ හැකිය. මෙම ක්රමය මගින් එකම ඉඩකඩක වැඩි අස්වැන්නක් ලබා ගත හැකිය.
පරිසර හිතකාමී පළිබෝධ පාලනය
නාගරික ගෙවතු වගාවේදී රසායනික පළිබෝධනාශක භාවිතය අවම කිරීම වැදගත්ය. පළිබෝධකයින් පලවා හරින සුදුලූනු, ඇතැම් මල් වර්ග ආදිය අනෙකුත් පැල අතර සිටුවන්න. වගාව කුඩා නිසා දිනපතා අතින් පළිබෝධකයින් ඉවත් කරන්න. සබන් දියර වැනි ස්වාභාවික පළිබෝධනාශක භාවිතා කරන්න. පරාගහරණයට සහ පළිබෝධ පාලනයට උපකාරී වන සමනලුන්, මී මැස්සන් වැනි සතුන් ආකර්ෂණය කරන මල් වර්ග වගා කරන්න.
ජල කළමනාකරණය
නාගරික ගෙවතු වගාවේදී ජලය කාර්යක්ෂමව භාවිතා කිරීම අත්යවශ්ය වේ. වැසි ජලය එකතු කර ගැනීම සඳහා කුඩා ටැංකි හෝ බැරල් භාවිතා කිරීමෙන් ජල බිල අඩු කර ගන්න පුළුවන්. පැලවලට ජලය දැමීම උදෑසන හෝ සවස් කාලයේ සිදු කිරීමෙන් වාෂ්පීකරණය අවම කර ගත හැකිය. මේ උපක්රමය උණුසුම් කාලගුණය පවතින කාලවලදී වැදගත් වනු ඇත.
